Странно и дивно есть зрети чудо сие, недоступное плотскому разумению, колеблют умы наша мятежныя смущения и недоумения: како мы, многогрешнии и недостойнии, возможем дерзати Тя, Пренепорочная Владычице, достодолжно восхваляти. Предузрев явление Образа Твоего, старец – духовник Лавры Почаевския, Божиим Промыслом преднаименова Его «Пристанище», очесами духовными силу и изобилие чудес прозревающе, чрез дивный Образ сей всем верным произтекающих, пристанище даруя людям православным, с Богом сущим, благодарящим Тя всеусердно и во умилении вопиющим:
Радуйся, людей озлобленных, к Тебе притекающих, умиротворяющая, Радуйся грешников к слезному покаянию понуждающая. Радуйся, погрязшие в греховной пучине души возрождающая, Радуйся, всем, обуреваемым страстями, мир и тишину посылающая, Радуйся, прельщенных бесовскою прелестию на путь правый обращающая. Радуйся, в пристань послушания и благочестия направляющая, Радуйся, болезни душевные вкупе с телесными исцеляющая, Радуйся, болящих, поврежденных разумом, просветляющая. Радуйся, яко людей, невинно осужденных, свобождающая, Радуйся, яко страждущих в темничных узах посещающая.
Радуйся, земное и Небесное Пристанище чад Твоих, в заступлении нуждающихся.