- У-у-у! - макӑрать Диана. - А-а-а! Яшкри сухана ҫиес килмест!
Диана паян кунӗпе тулта вылярӗ. Ывӑнчӗ. Хырӑмӗ выҫрӗ, анчах яшкине вӑл ҫиесшӗн мар. Ун вырӑнне эклер пулсанах!
— Шӳрпине те пулин сыпса яр, - лӑпкӑн хистет ашшӗ.
Диана ҫиес тесе кашӑка алла тытать:
- Кашӑкки таса мар!
Ашшӗ ӑна ҫӑвать.
- Халӗ йӗпе!
Дианӑна пурте япӑх пек туйӑнать. Вӑл макӑрса ярать.
Сасартӑк кантӑкран шаккаҫҫӗ:
- Уп-уп!
Хыркук (удод) вӗҫсе кӗрет. Кайӑкӑн сӑмси вӑрӑм, пуҫӗ ҫинче тӗлӗнмелле кулӑшла тӗпек.
- Уп-уп! Эсӗ макӑрнипе эпӗ нӑрӑ тытаймастӑп! Сассуна илтсен тӗкӗм кӑнт тӑрать!
— Сан тӗпекӗ пуҫ ҫине ҫыпӑҫтарнӑ хӳре пекех, - кӑшт кулса илчӗ Диана.
— Ан йӗкӗлте, хӗрача, - кӳренет кайӑк. - Ман мӑшӑра вара вӑл питӗ килӗшет!
Пуҫӗ ҫинче пӗр ҫӳҫ пӗрчи те юлман Диана ашшӗ ассӑн сывлать:
- Манӑн ҫакӑн пек тӗпек пуласчӗ.
Кайӑк Дианӑна куҫӗнчен тӳррӗн пӑхать:
- Ма куҫҫуль кӑларатӑн. Мӗн пулчӗ?
- Пурте мана кирлӗ пек мар!
- Тен, ачам, эсӗ выҫӑ, ҫавӑнпа йӗретӗн? Тӑхта-ха!
Хыркук вӗҫсе тухать. Ҫавӑнтах ӑманпа таврӑнать.
- Ме!
- Фу-у-у! - Диана питне аллипе хуплать.
— Часах таврӑнӑп, - тет те ӗҫлӗ хыркук сасартӑк вӗҫсе каять.
Ҫавӑнтах “кеп-кеп” тени илтӗнет.
Кукӑр сӑмсаллӑ пӗчӗк хӗрлӗ кайӑк вӗҫсе кӗрет.
- Эсӗ нӑйланипе эпӗ хӑраса йывӑҫ ҫинчен персе антӑм!
- Сӑмсу ҫине ӳкрӗн-и вара? Мӗншӗн вӑл сан ҫав тери кукӑр?
- Эпӗ кукӑрӑсӑмса-иҫ (клест). Сӑмсана пула эпӗ йӗкел вӑррине чакаласа кӑларма пултаратӑп, юратнӑ чӗпсене тӑрантаратӑп. Мӗн пулнӑ сана, хӗрӗм?
Диана кукӑрсӑмсана хӑлхинчен пӑшӑлтатса калать:
— Мӗншӗн макӑрнине хам та астумастӑп ӗнтӗ. Аттене ан кала кӑна.
— Юрать.
Тен, санӑн тутли ҫиес килет? Апат ман кӑмӑла яланах хӑпартать. — Кукӑрсӑмса тӗкӗнчен хыр вӑрри кӑларать те Дианӑна тӑсса парать. Хӗр ача ӑна шӑршласа пӑхать те тутине тӑсать:
— Эпӗ ун пеккине ҫиместӗп.
Сасартӑк “крак-крак” тени илтӗнет.
Кухньӑна вӑрӑм ураллӑ чарлан кӗрет.
— Крак-крак! Эпӗ пӗр ура ҫинче тӑнӑччӗ. Сана илтрӗм те мӗнле персе антӑм!
— Тен, эсӗ кӑнттам пулнипе вӑл? - Диана ихӗлтетет. Пӑртак лӑпланчӗ хӗр.
— Эпӗ-и? Кӑнттам? Хӗрӗм, эпӗ халех кӳренме пултаратӑп. Хӑвӑртрах мана мӗн те пулин ырри кала-ха.
— Ҫав тери капӑр эсӗ.
- Тавтапуҫ! Эпӗ пӗлетӗп. Тӗкӗ вара ман епле, сӑна-ха! Тата пӑх-ха, ак ҫапла хӑрах ура ҫинче тӑма пӗлетӗп. Унсӑр пуҫне, эпӗ питӗ чаплӑ пулӑҫӑ!
Сасартӑк ҫав вӑхӑтра чӳречерен пулӑ вӗҫсе кӗрет. Чарлан ӑна халех тытать.
- Тсрик-тсрик! - илтӗнчӗ чарлан ҫӑварӗнчен.
Чарлан сӑмсине уҫать. Пулӑ тухса ӳкет те, унпа пӗрле — пӗчӗк кӑвак кайӑк.
Диана йӑл кулать:
- Епле илемлӗ кайӑк ку! Пӑч-пӑч кӑвак тумлӑ. Эсӗ кам?
- Эпӗ пулӑҫ кайӑк (зимородок). Капӑрланма тата юрлама юрататӑп. Ку пуллине эпӗ ятарласа хӑнана пыма тесе тытнӑччӗ.
- Сӗтел хушшине ирт апла. Каҫар та, сана хӑнана чӗнекенни кам пулнӑ вара? - ыйтать Диана.
Кунта хыркук таврӑнать:
— Эпӗ чӗнтӗм. Атьӑр пӗрле савӑнар, юрӑ юрлар-и?
— Лайӑх шухӑшласа кӑларнӑ эсӗ, — Диана ашшӗ кайӑка куҫа хӗссе калать, — анчах эпӗ юрлама пӗлместӗп.
— Эпӗ питӗ лайӑх юрӑҫ, - мухтанать хаваслӑ чарлан. - Ак ман пек юрла. Крак-крак! Крак-крак!
Диана хӑлхине хуплать те ихӗлтетет.
— Апла эпӗ те пултаратӑп пуль, - кулать ашшӗ. - Крак-крак!
— Эпӗ те пултаратӑп эппин, - хӗпӗртет Диана. - Крак-крак, крак-крак!
Пулӑҫ кайӑк кая юлмасть:
- Тсрик-тсрик!
Хыркук сӗтел тӑрӑх чупса ташлать:
- Уп-уп!
Кукӑрсӑмса хутшӑнать:
- Кеп-кеп!
Кухньӑра шавлӑ та хаваслӑ. Кайӑксем вӗҫеҫҫӗ, ҫуначӗсене ҫупаҫҫӗ. Диана ахӑлтатса кулать. Ашшӗ те.
Юлашкинчен хыркук ҫапла калать:
- Мӗнле аван-ҫке. Кулнӑ чухне макӑрас та килмест.
- Пире вара чӗпӗсем кӗтеҫҫӗ. Кайма вӑхӑт ҫитрӗ, - тет кукӑрсӑмса.
Кайӑксем вӗҫсе каяҫҫӗ.
- Мана пулӑ ӑшаласа паратӑн-и? - ыйтать ашшӗнчен Диана. Унӑн урӑх пӗртте макӑрас килмест.